Haustsommar

Kalven veks 

Små taggar 

geviret synest 

 

Simla roleg 

Finn gras og strå 

Lauv og urter 

musøyra grøne 

 

Natta lengre 

Stjerner kjem fram 

Bukken trekker 

simlene samla 

brunst og paring 

er nær

 

Graset gulnar på myr 

Den beste tida på året for reinen er truleg når sommaren går mot haust. I fjellet blømer plantene, o dei er framleis næringsrike og grøne. Insekta er borte, og dyra får ro til å beite, kvile og tyggje drøv. 

Ofte er dette einaste tida på året der simlene går i pluss i energi.

Enno går simlene i flokkar med kalvane sine og med andre ungdyr, medan bukkane kan gå saman i små grupper eller for seg sjølve. Mot slutten av august byrjar bukkane å bli urolege, og dei byrjar å leite opp simlene.

Geviret til bukkane er no stort sett ferdig utvakse. Det mørke hudlaget som gjev geviret næring og vekst, basten, tørkar inn. Dei eldre bukkane byrjar feiinga. Då stangar og skubbar dei geviret i tre og buskar og gjer seg klare til kamp og konkurranse om simlene.

I denne tida trekkjer dyra gjerne ut av sommarbeiteområdet. Reinsdyra førebur seg til brunst og paring, og simle- og bukkeflokkane finn kvarandre etterkvart. I slutten av september byrjar brunsten.

August er også ein fin månad for mange menneske i fjellet. Fjellvandring, bærsanking og etter kvart jakt er aktivitetar som også uroar reinsdyra. Fleire stader ser ein at reinen let vera å trekkje inn i og bruke område der det er turistløyper, hytter og vegar i fjellheimen.

I perioden frå 20.august til 30. september er det reinsjakt. Fjellet blir oppsøkt av jegerar, og det kan   vera vanskeleg for reinen å finne ro. Særleg gjeld det i terreng med mange jegerar, og der det er flatt og ope. Jakta regulerer bestanden i dei ulike villreinområda. 

Når dyra blir uroa, får dei mindre tid til beite enn dei skulle. Då må bruke meir energi på å springe og trekkje, og dei går glipp av ei viktig tid når dei skal førebu seg til vinteren.

Men dersom dyra får gå i fred, er dette ei god tid for reinsflokken.